Со овој нов уред мажите ќе можат да ја испитуваат спермата и дома

Неколку студии што беа објавени во последните децении укажуваат на постојан пад на машката плодност, иако причините за ова појава се сѐ уште недоволно јасни, а наодите противречни. Но, она што е јасно е дека намалениот број на сперматозоиди може да доведе до неплодност. И покрај тоа што најчесто жените се „обвинуваат“ за неплодност, мажите се целосно или делумно одговорни во половина од случаите на неплодност кај паровите.

Една компанија со седиште во Ливермор, Калифорнија креирала уред со којшто ќе може да го одредите бројот на сперматозоидите во домашни услови, подеднакво квалитетно како и во лабораторија.

Се нарекува „Trak“ и веќе доби одобрение од Управата за храна и лекови на САД да се појави на пазарот.

Во основа се работи за пренослива центрифуга, која работи на следниот начин: мал примерок од спермата се става во патрон за еднократна употреба кој се закачува за базата. Базата го врти патронот како мал пропелер со што спермата се разделува на составните делови. Изолираните сперматозоиди се полнат во проѕирна комора – слично како живата во термометарот, а ознаките на патронот покажуваат дали имате оптимален, умерен или голем број на сперматозоиди. Уредот може да се спои со апликација на паметните телефони, што  ви овозможува да го следите нивото на вашите сперматозоиди и да го споредувате со статистичките податоци.

Иако сѐ уште го нема во продажба, фирмата „Sandstone Diagnostics“ која го произведува уредот им овозможува на луѓето да го резервираат преку нивната веб страна.

И да ве потсетиме – се додека здраво се храните, избегнувате долго седење, ако се ослободите од мобилните телефони и долната облека, со вашата сперма би требало да биде сѐ во ред.