Археолози открија остатоци од девет неандерталци во пештера недалеку од Рим, објави во саботата италијанското Министерство за култура.
Во соопштението се вели дека осум остатоци датираат од пред 50 000 и 68 000 години, а еден, најстариот, од пред 90 000 и 100 000 години.
Остатоците се пронајдени во праисториските пештери на Грота Гатари, откриени пред повеќе од 80 години, а се наоѓаат на околу 100 метри од брегот на Тиренското Море во регионот на Лацио, пренесува Ројтерс.
Коски, черепи и други делови од телата, пронајдени на локацијата може да се видат на видеата кои се објавени од страна на Министерството.
Неандерталецот е име за посебен вид праисториски човек кој ја населувал Европа и дел од Азија и изумрел пред околу 40 000 години. Не е познато што ги убило, иако теориите наведуваат дека истребувањето се случило поради неможноста да се прилагодат на климатските промени и зголемената конкуренција од современите луѓе.
Ако ги земеме предвид другите остатоци пронајдени порано на истото место, вкупно 11 лица беа пронајдени во Грота Гатари. Грота Гватари е едно од најважните места во светот кога станува збор за историјата на Неандертал.
Таму се пронајдени и остатоци од животни, вклучително и ауроши, големи изумрени говеда.
