Историска битка на „компјутери-хакери“ во Вегас

СПОДЕЛИ

Седум целосно автономни компјутери ќе се соочат во историска битка во Лас Вегас следниот месец, при што секој ќе се обиде да се заштити себеси од хакирање и да ги истакне недостатоците без човечка контрола.

Натпреварот на „DARPA“ којшто е наречен „Cyber Grand Challenge“ и е закажан за 4-ти август 2016 година, ќе се одржи во Лас Вегас за време на двете најголеми хакерски конференции „Blackhat USA“ и „DEFCON“ и можеби ќе докаже дека машините можат да ги победат дури и најдобрите човечки хакери.

Просечно, недостатоците во софтверот остануваат незабележени околу 312 дена – што хакерите често го искористуваат. Откако човекот ќе ги забележи тие недостатоци, најпрво треба да ги разбере, па да ги поправи и потоа да ги направи достапни за пошироката заедница, што може да трае речиси една година. Научниците сакаат да го автоматизираат овој циклус и да го претворат во нешто што може да се поправи за неколку минути, па дури и секунди.

Компјутерите се програмирани од страна на седум тимови на финалисти за да го препознаат и разберат непознатиот софтвер, да му ги откријат недостатоците и да го поправат. Откако ќе започне натпреварот, компјутерите ќе бидат препуштени самите на себе.

Овој предизвик, односно натпревар е главно насочен на одбраната. Комјутерите нема меѓусебно да се хакнуваат, туку ќе бараат недостатоци во сопствениот софтвер, како и во софтверот на другите компјутери и потоа ќе испратат порака до судијата кој ќе провери дали пронајденото е точно и дали со тоа би можело да се хакне другата машина.

Првопласираниот тим ќе освои награда од 2 милиони долари, второпласираниот 1 милион долари и третопласираниот 750 илјади долари.

Дискусија

Коментари