Населението во Јапонија се повеќе старее, а деца се раѓаат се помалку. Тоа создава низа проблеми, меѓу кои и недостаток на негуватели за стари лица. Во обид да го компензира овој недостаток, државата најде друго решение – роботи.
Истражувачкиот институт „RIKEN“ изработи робот со лик на „мило кадифено мече“ што може да ги подигне и да ги носи лицата кои тешко се движат, или да им помогне да станат и да се потпрат на помагалата за одење.
„ROBEAR“ е третиот по ред робот изработен со лик на кадифено мече. Првиот и вториот робот беа наречени „RIBA“ и „RIBA-II“- иако ниту еден од нив се’ уште го нема на пазарот.
Роботот (ROBEAR) е поусовршен од својот претходник „RIBA-II“. Многу е полесен, тежи 140кг, за разлика од „RIBA-II“ кој тежи 230кг. и има помала основа што го прави покомпактен и полесен за управување. Направени се и други, внатрешни подобрувања што му овозможуваат на роботот да ги движи зглобовите со поголема брзина и прецизност, а исто така и движењата наназад да бидат полесни и порамномерни.
Три типа на сензори му овозможуваат на роботот да биде и понежен исто така. Поставени се посебните паметни тактилни сензори и други сензори, кои му овозможуваат на роботот да „чувствува“. Тоа значи дека роботот може да ги подигне пациентите без да ги повреди или да ги загрози.
