Новите радарски истражувања покажале дека во гробницата на фараонот Тутанкамон нема скриени соби, изјави ресорниот египетски министер Мустафа Вазири.
“Радарските снимки на гробницата потврдија дека нема соби, врати или скали” – вели Вазири.
Британскиот египтолог Николас Ривс претходно изјави дека деталните фотографии и снимки од северниот ѕид на гробот укажуваат на постоење на отвори во нова комора.
Сепак, сега се демантирани тврдењата дека внатре покрај гробницата на Тутанкамон се наоѓале и други простории.
Тутанкамон беше еден од последните кралеви на Египет од 18 династија. Неговата гробница беше откриена во 1922 година и за разлика од другите гробници во Долината на кралевите во Луксор таа не беше ограбена.
