Ова е последниот надграден прототип дизајн на овој импресивен летечки автомобил, за кој неговите создавачи велат дека ќе ја револуционизира транспортната индустрија.
Прототипот бил претставен на технолошката конференција во Виена на 29-ти октомври. Неговите пронаоѓачи, Стефан Клајн, словачки инженер и главен дизајнер на „AeroMobil 3.0“ и Јурај Вакулик, извршен директор, велат дека работеле на овој проект во последниве 30 години и дека нивниот сон за целосно функционален летечки автомобил конечно ќе се оствари.
„Планираме дека некаде помеѓу 2016/2017 година ќе може да се испорача и првиот производ на потрошувачите, но ова прашање останува се уште отворено . Сега за сега, го тестираме“, вели Јурај.
Летечкиот автомобил тежи само 400кг. и има опсег на летање од 700км. Сегашниот прототип има крилја со распон од 8 метри. Работи на бензин и троши само 7,5 литри на 100км. Последното надградување вклучува и карактеристики кои ќе се најдат во финалниот производ, како на пр. авионска опрема, автопилот и напреднат систем со падобран.
„Ова не е играчка за дечиња. Не е нешто чудно за во холивудските филмови. Ова е нешто што е навистина неопходно за личниот транспорт бидејќи можноста да полета и да го избегне сообраќајниот метеж го прави многу поефикасно и побрзо средство за транспорт“, вели Јурај.
Автомобилот лесно вози по улиците со крилјата собрани навнатре за да не ги оштетува останатите возила, а кога ќе посакате да се вивнете во небото, потребни се само неколку секунди за крилјата да се отворат. Се што е потребно за автомобилот да полета се околу 200м. рамна земја. Тимот, во моментов, се обидува да ја намали „пистата“ која што му е потребна за да полета, бидејќи толкава далечина е тешко да се обезбеди во урбаната средина.
Меѓутоа, колку и да е импресивна оваа опрема, тешко дека летечките автомобили ќе станат популарни уште многу долго време, и самиот Клајн е свесен за тоа. Со тоа што градењето на патишта е скапо, а воздухот е бесплатен, Клајн вели дека „Aeromobil“ би бил најмногу корисен во слабо населените земји каде што заедниците се поврзани само со земјени патишта.
