Со малку помош од вештачката интелигенција, поточно роботот Ева, британските научници установиле дека една вообичаена состојка на пастата за заби може да се искористи за развој на лек кој ќе биде ефикасен во спречување на вирусот на маларија, кој е отпорен на досегашните лекови.
На Универзитетот во Кембриџ, британските научници со помош на роботот Ева, спровеле скрининг со цел да установат како триклосанот, супстанцата која се наоѓа во пастата за заби сокрива потенцијал за прекин на развојот на инфекцијата со маларија дури во нејзините критични фази – во крвта и на црниот дроб.
Последиците од оваа тешка болест не успеваат да ги преживеат околу половина милион луѓе во светот, а повеќето починати се деца од најсиромашните африкански земји.
Маларијата може да се лекува со голем број различни лекови, но со текот на годините отпорноста на инфекцијата зајакнува, па така во блиска иднина може да се случи да неделува ниту еден лек.
Токму поради таквата причина, научниците уште еднаш се ангажираа за откривање на нови решенија, стои во исказите на Стив Оливера од одделот за биохемија при Универзитетот во Кембриџ, кој е лидер на оваа студија во соработка со колешката Елизабет Билсленд.
Откако го префрлиле паразитот на маларија во нов домаќин со помош на убод од комарец, тој успешно се проширил по црниот дроб. Таму созреал и се размножил. Потоа се проширил по црвените крвни клетки, а набргу по целиот организам, предизвикувајќи треска и компликации кои се опасни по живот.
Научниците и претходно знаеле дека триклосанот може да го блокира растот на паразитот во крвта и дејството на ENR ензимот кој е вклучен во производството на масните киселини.
Триклосанот како состојка на пастата за заби помага во спречување на порастот на забниот плак. Тимот на Д-р. Билсленд во последната студија потврдува дека триклосанот успешно го блокира делувањето на еден ензим кој инаку се наоѓа во клетките на паразитот.
Тие докажаа дека триклосанот ефективно делува на тој ензим, дури и кај паразити отпорни на антималаричен приметамин.
“Откритието, чии наоди се објавени во списанието Scientific Reports, сугерира дека можеме да произведеме нов ефективен антималаричен лек со помош на триклосан”, вели Елизабет Билсленд.
