Според новото истражување, печурките ја развиле оваа способност за да ги привлекуваат инсектите кои пак можат да им помогнат при ширењето на спорите, со што печурките полесно би се размножувале.
Тимот на бразилски и американски истражувачи ја истражувал зелената светлина која ја емитуваат печурките „Neonothopanus gardneri“ кои најчесто може да се најдат на дното на кокосовите палми во Бразил. Претходно, научниците сметале дека тие постојано емитуваат светлина како нуспроизвод на некој метаболички процес, но сега откриле дека тие светат само ноќе, па така всушност ефикасно ја користат енергијата, бидејќи во текот на денот светлината би била премногу слаба за да се види. Ако светат само ноќе, тогаш биолуминисценцијата мора да има одредена цел.
За да ја одредат таа цел, научниците направиле експериментални печурки од акрилна смола и биле опремени со диоди кои емитуваат светлина на слична бранова должина како и печурките. Светлината привлекла голем број на инсекти, па така научниците откриле дека тие им помагаат на печурките при разнесувањето на спорите, во случаи кога нема ветер.
Истражувањето е објавено во „Current Biology“.
