Притаено зло

Како што историјата одново и одново ни покажува, патот на злото често содржи некои прилично изненадувачки заобиколувања. И, како што се следниве случаи покажуваат, злото доаѓа во неочекувани форми.

1. Пол Пот, париски студент

Три децении пред да го наметне убиствениот режим, во 1949 година, 24-годишниот иден диктатор добил стипендија за радио електроника во Париз, каде што, како и многу студентски активисти, уживал во танцување и дискусии за политика. Неговото искуство со студирање во странство несреќно завршило кога тој не успеал да дипломира три години по ред, принудувајќи го да се врати во Камбоџа во 1953 година, истата година кога поранешната француска колонија станала независна. За текот на неговото време на власт, Пол Пот наметнал верзија на аграрна колективизација, принудувајќи ги граѓаните да се преселат на село за да работат во колективни фарми и на други проекти кои подразбирале принудна работа, кон целта за „рестартирање на цивилизацијата“ во „нулта година“.

Комбинираните ефекти од принудна работа, неисхранетоста, лошата медицинска нега и егзекуциите резултирале со смрт на околу 1,7 до 2,5 милиони луѓе, што е приближно 21% од вкупното население на Камбоџа. Французите сигурно се каат што не му ја дале дипломата, можеби се ќе беше поинаку.

2. Џим Џонс, активист за човекови права

Џим Џонс, харизматичниот американски верски водач и основач на Народниот храм, е најдобро познат по неговата улога во култот на групата за убиство/самоубиство во Џонестаун во 1978 година, вклучувајќи и труење на повеќе од 300 деца. Масакрот се случил со пиење на сок од портокал со цијанид. Оние кои одбиле, биле застрелани. Но, пред да стане лидер на култ, Џонс бил признат организатор, поборник за интеграција на општеството и директор на Комисијата за човекови права на Индијанаполис во 1961 година. Како млад човек жестоко се залагал за Афроамериканците и нивните права во тоа време.

3. Иди Амин, шампион во тешка категорија

Само една деценија пред да ја преземе власта во Уганда, Иди Амин бил национален  боксерски шампион во тешка категорија повеќе од осум години. Исто така, бил и одличен рагби играч за кој народот имал само пофални зборови. И од примерен спортист, станува воен диктатор. И претседател на Уганда од 1971 до 1979 година. Периодот на неговото владеење е карактеризиран со кршење на човековите права, политичка репресија, етничко чистење, убиства  на политички противници и протерување на азијатите од Уганда. Бројот на жртви е непознат, но проценките се околу 500.000.

Од 1977 до 1979 година, Амин носел необична титула, која сам си ја доделил: „Неговата екселенција доживотен Претседател на Република Уганда фелдмаршал хаџија д-р Иди Амин Дада, господар на сите животни на земјата и освојувач на Британскатаимперија во Африка“. Така изгледа неверојатна егоцентричност и суета. Штета што не продолжил да се занимава со спорт.

Листава може да продолжи до бескрај. Сепак, во сегашноста, можеби ќе сакате да размислите за очниот лекар Башар Асад или наставникот Роберт Мугабе. По се изгледа, прашањето „Што сакаш да бидеш кога ќе пораснеш“, не е така наивно.

Поддржете ја нашата работа: